漢堡質厚受讓搵食格

猪拉多纳

德甲獨腳戲奧格斯堡主場鬥漢堡，奧格斯堡近三仗保持不敗，不過黑柴認為只係咁蹺遇上較弱及態沉對手，本身實力有限，今仗要讓波實在過分，推介漢堡受讓平半嘅下盤。

（有線64及204台周六凌晨2時30分直播）

漢堡近5場聯賽3勝1和，只係上仗主場對史特加演出走樣輸0比1，但平均演出水準明顯在奧格斯堡之上，上仗陣中靈魂雲達華治表現失常係輸波主因，今仗賽前佢聲言會踢身價波，漢堡上仗下半場變陣，潛力優厚翼鋒比斯達入替後，明顯激活球隊鋒將，今仗佢將會擔正，漢堡進攻組織方面肯定會更加流暢。

漢堡今季最大法寶係門將艾達，呢位前德國國門多次憑一己之力拯救球隊，經過8輪聯賽，佢4度入選每輪最佳11人，奧格斯堡要入佢波絕不容易。
奧格斯堡攻力不濟

奧格斯堡級數低，季初頭5場聯賽只得1分，近3仗成績好轉，但所遇對手分別只係因為波利斯胡錫域受重創而分心嘅賀芬咸、突然踢出今季最劣作嘅雲達不來梅、同埋嚴重欠缺進攻意識嘅紐倫堡，本身演出平平，今仗賽前更傳來噩耗，隊長華希亞治受重創要長抖，呢班波最大問題係進攻乏力，近6場聯賽除對住防線夢遊嘅不來梅之外，其餘5仗合共僅入1球，被寄予厚望嘅箭頭艾斯泰迪賓斯至今仲未開到齋，咁嘅攻力憑乜嘢讓人波？