韋根主場咸魚翻生

猪拉多纳

周中歐洲賽大家有無執番多少呢？我就叫打個平手冇乜贏輸，話晒有咁多爆冷賽果下，都叫執番身彩！呢個周末大部分強隊嘅比賽集中喺星期日，今晚寧願揀周中冇比賽嘅球隊，小妹睇好韋根，主場對韋斯咸讓平半捧上盤。

（有線202及302台周六晚10時直播）

唔講唔覺，韋斯咸八場聯賽竟然取得4勝2和2負靚績，已經有14分排第6，真係估唔到呢支升班球隊咁堅，其實季初我都有買吓佢哋主場比賽，好似贏維拉嗰場我都向大家推介過，但帶波嘅「大Sam」艾拿戴斯一向畀我感覺「唔正路」，依家聯賽有咁多分喺手，係時候放軟手腳。大家亦可睇番韋斯咸贏過嘅對手，除富咸較有實力外，其餘三隊係維拉、昆士柏流浪同修咸頓，都係幾支榜尾分子嚟咋，實力不宜高估。
英聯盃贏過４比１

今晚「錘仔幫」作客對排名16嘅韋根獲得受讓，表面上好似有着數，但我一向唔貪便宜，都係買番韋根好啲。韋根今季主場未贏過都要讓平半，未有被莊家睇淡，擺明今場有啲計噃！其實球隊四場主場比賽雖然2和2負，但當中三場都有波入，攻力唔算太差，中前場有占士麥卡菲同馬隆尼等等，睇過佢哋表現都硬淨。其實上個月尾兩隊喺英聯盃碰過頭，當時韋根作客炒過韋斯咸4比1，今晚分分鐘食過翻尋味再贏多次，讓平半上盤我買硬！
Wendy推介

韋根 上盤