獅吼發惡流浪者遭殃

猪拉多纳

澳職開鑼3輪之後，西悉尼流浪者成為唯一未入過波嘅球隊，畢竟佢哋剛於今年成立首季參賽，球員仍需要時間磨合，短期內恐怕難有重大起色。西悉尼流浪者今仗作客上季總冠軍布里斯班獅吼，相信又係捱打居多，再大敗一場一啲都唔奇，難怪主W熱爆燈，可直取獅吼「讓球主勝」。

（有線64及204台周六下午4時45分直播）

獅吼開季後戰績唔算理想，僅得1勝1和1負，好大程度上受賽程安排影響，首仗就要作客上季總決賽對手珀斯光輝，上仗又要遠赴新西蘭鬥威靈頓鳳凰。獅吼喺兩場惡戰中失分，情有可原。不過獅吼主場對墨爾本勝利，就立即發揮應有水準，大炒對手5比0。最重要係獅吼前鋒貝利沙狀態相當弗，呢位上季神射手近兩仗共有3球進帳，今仗遇上澳職實力最弱嘅流浪者，又係大開殺戒時候。

西悉尼流浪者擁有日本中場球星小野伸二助陣，奈何球隊新埋班，一切由頭開始，需要一段長時間先至可以建立足夠默契。球隊現時靠球員個人質素搵食，攻勢好易被對手瓦解，所以3戰仍冇波入。雖然流浪者防守不俗，但久守必失，更何況獅吼中前場有唔少射得之人，以流浪者目前弱勢，好難招架得住。