聖人修咸頓變黃大仙

猪拉多纳

英超失波王修咸頓今輪主場迎戰熱刺，對於大盤客而言，「聖人」有如提款機，長追長有，聯賽8戰狂失24球，近六場聯賽全開大，非常誇張，呢班波踢法有前冇後，今次對住熱刺好大機會再上演入球騷，捧大！

（有線201及301台周日晚11時直播）
８戰狂失24球

修咸頓重返英超大踢性感足球，為唔少球迷帶來驚喜，呢隊波進攻完全冇問題，除射手列基林拔識入波，中場加斯頓拉美利斯同拉爾拉拿等都有士哥能力，攻擊點都幾多。不過，「聖人」防線只得英冠水平，中堅凱維特曳到唔恨，上次作客韋斯咸半場互交白卷，換邊後失4球，真係好得人驚！大軍開季聯賽8戰失24球，自己一隊都夠開大，條路咁順，冇理由唔繼續追。

熱刺於教頭保亞斯帶領下慣踢一個前鋒，射手迪科爾擅於鑽營，而且把握力強，面對修咸頓條豆腐防線實有大把機會。另外，左腳王加里夫巴利傷愈復出，可以同艾朗連儂雙翼齊飛，對手肯定有排煩。熱刺後防續有中堅卡保奧及左閘伊高圖養傷，中場柏加亦需休戰，射手艾迪巴約有輕傷，但球隊三線人腳都算完整，有本錢狂攻修咸頓，相信今場又會有大量入波，大盤夠穩。