國米強勢「博」客Ｗ

猪拉多纳

今晚8場意甲，Ali最睇好大勇嘅國際米蘭，佢哋今季係名副其實作客王，遇上態沉弱旅博洛尼亞有力延續強勢，推介1.98倍客Ｗ。

（周日晚10時開賽）

國米季初成績曳，意甲輸過畀羅馬同錫耶納，歐霸輸過畀夏德，面對華斯路伊同魯賓卡山都只係賽和，但要留意一個特點，呢5場贏唔到嘅比賽全數喺主場踢，相反佢哋作客全勝叻仔到極，除咗歐霸贏過夏德、華斯路伊同尼菲治之外，喺意甲對佩斯卡拉、拖連奴、基爾禾同AC米蘭亦贏晒。大家唔好以為佢哋客優於主係偶然，事實上教練施特拉馬斯安尼將球隊戰術改變，防線採用三後衞配一對翼衞嘅三五二陣式，喺大部分作客賽事都將對手創造埋門嘅機會減到最低，然後再利用反擊制勝。

國米近期喺意甲同歐霸兩線作戰已累積6連勝，目前喺意甲只落後榜首祖雲達斯4分，施特拉馬斯安尼喺歐霸賽事採輪換制，主場只小勝柏迪遜，擺明留力聯賽搏殺。

博洛尼亞近4場聯賽輸咗3場，正為護級掙扎，記得上仗作客對弱旅卡利亞里前，幾名主力球員都高呼充滿信心可以贏波，但得把口冇用，最終輸0比1，佢哋面對護級分子基爾禾、錫耶納同卡利亞里輸晒，即使主場對住十人應戰嘅佩斯卡拉，晨早取得領先優勢下都畀人逼和，相當洩氣。何況今仗陣容不整，4大主力包括後衞拿達利、中場迪亞高佩雷斯、亨利基文尼斯同箭頭艾基費斯卡悉數因傷缺陣，遇上作客王光臨注定要輸多場。
烏甸後衞荒 羅馬「大」佔便宜

同日尾場羅馬主場對烏甸尼斯，客軍幾乎所有正選後衞都唔可以上陣，入球大同主勝走唔甩，不過賠率較奀，建議用嚟做過關膽。

（周一凌晨3時45分開賽）
Ali 推介：

國際米蘭勝 ★★★★

阿特蘭大平手盤 ★★★★

羅馬大 ★★★★