紅魔強鋒煞車

猪拉多纳

英超榜首「紅藍」大戰今晚爆發！車路士同曼聯係今季英超最有冠軍相嘅球隊，雖然聯賽仍然喺早段，但有人話呢場係今季冠軍前哨戰，阿占都覺得冇講錯。車仔開季踢出霸氣，不過講到「冠軍DNA」，曼聯真係根深柢固，無論球迷彈佢哋中場點樣不足、後防點樣唔掂，關鍵時刻總有人出嚟化腐朽為神奇，況且紅魔踢硬仗向來有把握，今場受讓平半幾大捧下盤！

（有線200、204及300、廣東體育周一凌晨0:00直播）

車路士喺英超連贏4場氣勢如虹，不過上周中歐聯就畀薩克達打窒道氣，射手費蘭度托利斯近期突然狀態大跌，搞到吓吓要靠班中場搵食兼數胡。雖然桑馬達、奧斯卡杜斯山度士表現突出，不過林柏特受傷唔踢得，隊長中堅泰利停賽，冇咗呢兩位鬥志101分嘅英格蘭核心，打呢啲寸土必爭嘅榜首大戰真係好輸蝕，華麗腳法有時真係唔及不死戰意o架！
林伯受傷 泰利停賽

講真車仔防線不穩嘅問題，曼聯有過之而無不及，睇完佢哋喺歐聯落後兩球反勝布拉加，有人會鬧曼聯防線唔對路，但阿占又真係好佩服呢班波嘅打不死精神。數埋數埋，原來紅魔今季已經6次先失波下反敗為勝，記得上季佢哋又係畀人鬧場場都贏得唔湯唔水，但踢波最緊要就係個「贏」字，曼聯無可否認就係識得點贏嘅球隊。
曼聯冇香川一樣猛火

正如領隊費格遜所講，曼聯今年最強地方就係有班能力超卓嘅前鋒，雖然香川真司受傷唔踢得，但朗尼移落少少一樣冇問題，佢同尹佩斯嘅合作愈嚟愈純熟，無論韋碧克同查維亞靴南迪斯邊個上陣都交到貨，咁強大嘅進攻火力堪稱英超No.1，今場要喺史丹福橋全身而退唔難，今晚一於支持曼聯個下盤啦！
頂占筍盤：曼聯（下盤）

車仔連開6場大

‧車路士近6仗共攻入21球，全部開大。

‧查維亞靴南迪斯、朗尼及尹佩斯上季對車路士均有入球。

‧自2003年起，曼聯英超作客史丹福橋未曾贏波。
兩強交鋒入波多

雖然話強強對壘踢法通常會保守啲，但偏偏紅魔鬼同藍戰士近10次對賽開足8次大，而且各自有尹佩斯、桑馬達呢啲數胡能手，車路士嘅入球點更加係夠晒分散，由前鋒到後衞都頻有進帳，1.68倍入球大走唔甩啦！
有線球彩台主持阿占

球彩電郵：soccer64@cabletv.com.hk

網上討論：http://fb.com/icable64

Phone波熱線：1831678

開放時間：周日晚10:00至周一凌晨2:30（快樂星期天）