英超1哥戰魔氣沖天

sherry

敗走歐聯車仔壞偈
英超爆發榜首對決，一哥車路士帶住聯賽不敗金身於主場迎擊死敵曼聯，「車仔」過去十季聯賽主場鬥「紅魔鬼」未嘗敗績，計績惡晒，但大軍喺歐聯慘敗於薩克達腳下露晒底，進攻唔順、防守唔穩，讓唔起曼聯平半，要下盤！

（有線300及200台周一凌晨零時直播）

泰利林柏特齋睇冇得玩
單睇英超戰績，車路士7勝1和，作客贏過倫敦雙雄阿仙奴同熱刺，冇乜好彈。再睇對賽往績，「車仔」近十次聯賽主場對「紅魔鬼」6勝4和，優勢明顯。不過，球隊上場作客薩克達全場捱打，輸1比2算少，佢哋後防甩晒位，中場唔夠搶，前面冇火力，三線問題全面曝光，相信曼聯教頭費格遜睇到掩住半邊嘴喪笑，所有靚績都無法掩飾球隊不足之處，今戰續有隊長泰利停賽，中場林柏特養傷，主場出戰亦無優勢。

曼聯今季喺各項賽事12戰8次先失波，防守同樣存在問題，費爵爺上場歐聯對布拉加收起中堅里奧費迪南同左閘艾拉，兩大後防主將抖夠，今次雙雙復任正選，預期防守會有改善。

曼聯4大鋒霸弗爆
「紅魔鬼」現時最恐怖之處係前線火力超強，除王牌前鋒尹佩斯外，朗尼、韋碧克及查維亞靴南迪斯等箭頭全面爆發，士哥能力遠在「車仔」之上，即使缺少門將連迪加特、守將尼曼查維迪及中場香川真司等主力，整體戰鬥力仍然好強。

自從莫連奴落「車」後，曼聯已經逐漸攞番優勢，近五次對車路士取得4勝1和，包括上年喺歐聯作客戰勝對手，今次有條件終止十季聯賽作客不勝「車仔」頹勢，受讓必捧！

lazytt