熱刺正氣炒修咸頓

猪拉多纳

勁慘！小妹上星期一連返咗4日展覽會，加加埋埋近兩星期冇放過假，搞到成個人勁燥底，仲生咗粒飛滋添，痛到喊囉！小妹雖然好攰，不過都有漏夜搵料幫讀者嘅，今晚英超有場修咸頓主場對熱刺，唔使諗咁多，一於繼續撐正氣熱刺，捧1.77倍客勝啦！（有線201及301周日晚11:00直播）

呢兩個星期小妹日日由朝做到晚，真係堅攰！最慘係上周段稿見街後，到依家仲未有人約我食大閘蟹囉！哼！算，好彩小妹近期推介都得手，幫到讀者贏錢，條氣總算順番啲！既然個勢咁好，小妹梗係繼續畀心機刨波啦，今晚英超大戰連場，當所有賭仔嘅焦點都集中喺默西賽德郡打吡同紅藍大戰身上，同晚登場嘅勁旅就唔怕聚飛，自然更易搵食！
聖人10號仔打柴防線決堤

冇錯，小妹講緊嘅就係熱刺喇！正所謂人逢喜事精神爽，對上兩仗因為陪老婆而缺陣嘅加里夫巴利，喺早兩日順利榮升老竇，呢位廿四孝老公喺尋日已歸隊復操，一班隊友仲四萬咁口恭喜佢添！尋日仲傳出皇馬有意用法比奧干查奧加現金換佢，巴利仔梗係想打爭氣波啦！陣營士氣鬼咁好，加埋艾迪巴約個背傷好得八八九九，拍住狀態大勇嘅迪科爾攻堅，又點會冇波入吖！

對家「聖人」修咸頓就慘咯，佢哋條防線好似決堤咁，面對曼聯、曼城同阿仙奴呢啲勁旅，最少嗰場都失3粒，上仗對住實力麻麻嘅韋斯咸，仲喺網入面執足4次波添！鬼咩！佢哋嗰件全能10號仔加斯頓拉美利斯仲養緊傷，後防主力丹尼爾霍斯又打埋柴，今鋪對住熱刺，輸少粒都要還神啦！
好掛住個靚樣呀！

經過一輪「地獄賽程」，小妹個樣殘咗好多，暗瘡同飛滋蒲晒頭，正所謂有相有真相，原本想畀大家睇吓我個殘樣，但諗諗吓仲有幾日先到萬聖節，費事咁早嚇親讀者啦！唉，我依家日日照鏡都會問自己一句：「幾時先可以見番靚靚嘅Sherry呀」？
Sherry

曾經有個甲組球員男朋友，回復單身後寄情掟飛鏢運動，偶然擔任兼職模特兒。