博皇馬煲魚生粥

猪拉多纳

皇馬今晚造訪馬略卡，「銀河艦隊」出閘脫腳畀巴塞隆拿拋甩，要縮窄積分差距今鋪不容有失，奈何一大籮傷兵直接影響戰鬥力，上周中歐聯作客多蒙特輸1:2場波，大概都反映到問題出喺邊，對住主場夠惡嘅馬略卡唔係易食，不過小弟都相信莫連奴有能力去克服難題，要大勝就難啲，但攞3分照計問題不大，一於博皇馬小勝而回，敲3.7倍「讓球和」。

（now633及660台周一凌晨4:30直播）
馬略卡近3戰皆輸1粒

馬略卡主場出名夠惡，就算強如巴塞同今晚對手皇馬，以往都試過衰喺呢支小島球隊身上。馬略卡開季5戰3勝2和，3場勝仗都係嚟自主場，不過唔知係咪季初去得太盡，佢哋最近突然跌Watt連輸3場，其中主場輸俾格蘭納達場波更加跌到成地都係眼鏡，可想而知狀態正處於低迷。值得一提嘅係，馬略卡最近3場波都係僅輸1球，今晚再出現呢個情況絕對唔奇。

皇馬傷兵重災區係中後場，一對左閘馬些路、法比奧干查奧、右閘艾比路亞同防中基迪拉都養緊傷。據《馬卡報》估計，主帥莫連奴好有機會再安排艾辛客串左後衞，然後出莫迪歷頂基迪拉個位。查實「寸王」有咩風浪未遇過吖，以佢老人家嘅應變能力同皇馬嘅星級陣容，照計要過馬略卡呢一關難度唔會大。

曾經聽教練講過，教頭嘅立場唔需要場場大勝，理得你贏1球定10球，袋到3分就已經收貨，莫連奴絕對係呢個信念嘅佼佼者。以往「寸王」無論係教車路士、國米定依家嘅皇馬，每逢歐聯之後返到聯賽都唔難見到魚生粥戰果，「讓球和」有分頭又好路，一試無妨。
馬略卡對賽往績蝕底

‧雙方近3季對壘，皇馬取得5勝1和壓倒性優勢。

‧皇馬鋒將C朗近7場聯賽及歐聯皆有進帳，總共攻入12球。

‧馬略卡近6季聯賽主場對住皇馬只得2和4負成績，對上1次主場贏皇馬要數到05-06球季，當時馬略卡反勝2:1。
張峰來料：皇馬「讓球和」

今季加盟日之泉JC晨曦的港腳張健峰，擅打左中場及左後衞多個位置，除了罰球有一手，最拿手係推介歐洲足球。