河床小保加「細」均力敵

猪拉多纳

英超今日有個「超級星期日」，阿甲呢邊亦有場「超級經典戰」（Superclasico）─河床對小保加，响南美估計有1.2億人收睇。但係經典未必代表好睇，呢場大家都唔輸得嘅波，好可能悶個1.52倍入球細出嚟。（開賽時間：周一凌晨2:30）

河床、小保加兩大豪門好似撈亂骨頭咁，由甲隊以至青年軍各個年齡階層交親手，一定火花四濺，甚至頭破血流，所以對雙方球員嚟講，情願降班都唔情願輸畀對方。今年更加攞命，事關外面一直傳緊，小保加呢邊啲球員同教練費斯安尼關係麻麻，管理層有意用呢場波嘅勝負，決定佢嘅去留；河床就因為升班後成績一般，依家只排第9，主帥艾美達仲有冇得撈，完全係睇呢鋪。
勝負定小保加主帥去留

關乎雙方教頭飯碗，呢場世仇大戰實打甩髀？咁又未必，事關打和嘅話，可能大家都唔使死，好似小保加咁，費斯安尼決定穩穩陣陣踢4-4-2，用經驗老到嘅基斯甸查維斯打右中場，代替古勒莫費南迪斯，基文迪洛迪古斯就踢番左閘，將有一定防守能力嘅文奴推上中場，加埋後衞艾美蘭奴艾賓傷愈復出，成個布局以穩為主。

主隊河床除咗10號仔蘭仙尼仲傷緊，後衞加比馬卡度、中場馬田阿古利都重披戰袍，教練艾美達恐防查斯古特膝傷好唔切，預咗用外號「中國人」嘅卡路士隆拿攻堅，瓣瓣計足晒數。由於兩邊都算到盡，而且由05年起，雙方交手18次開咗15次細，今場應該都係「細」均力敵o架嘞！