潘顿进步 韦达落後

猪拉多纳

　　目前本港骑师榜之中，上名率超过4成得两位，潘顿及韦达，坐骑演出稳定性可想而知。而二人分列第一及第三位，论目前声势、手风，好明显前者係好好多，睇埋往绩更一目了然。

　　先讲韦达，现时手上有12场头马，与上季同期比刚好下跌了三分一！因为上季首两个月赢到18W，虽然两季之内，可能在期数、出赛次数等，略有偏差，但点都唔会相差三分一咁多。再数前季同期，首两月赢到15W，亦都比今季为多，原因何在？唔多清楚，实际情况则摆在眼前。

　　潘顿情况刚好相反！可以用大跃进来形容，经过刚周日赛事之後，目前累积17场头马，查佢对上三个季度头马纪录（首3个月），09/10年度胜出11W、10/11年度胜出15W、11/12年度胜出13W，最叻数到前季，但都係比今季少！要知道，佢只係花上两个月便超越前季之数，进步幅度之大，从头马数字已完全睇得到。

　　骑练合作新制促成？

　　係咪因为马会将今季骑练合作改制，促成有此变化，真係唔了解。不过，早年已经指出，某啲马落入潘顿手上，的确係有幾唔同演绎，可以忽然跑得好好多，一隻係咁，两隻又係咁，就唔会叫做巧合或符碌，亦因此，为何佢久唔久会赢啲「无厘啦更」大冷门，好大程度係呢个原因。