馬體會直搗蝙蝠洞

猪拉多纳

今晚西甲壓軸好戲，近況勇得交關嘅「二哥」馬德里體育會，作客今季喺蝙蝠洞未輸過嘅華倫西亞。雖然兩軍旗鼓相當，但心態迥異，後者下周中歐聯有場對巴迪的出線關鍵戰，於歐聯大過天嘅情況下，今仗戰意難料，相反馬體會在歐霸順風順水，晉級只係時間問題，可傾盡全力死拚華倫，受讓真係筍到爆，「讓球客勝」有買趁早。

（now 632周日清晨５時直播）
華倫西亞留力歐聯

其實雙方下周中均有歐戰後顧，「蝙蝠軍團」現於歐聯F組與巴迪、拜仁同得６分，始終歐聯係個金礦，若想爭出線，嚟緊主場對巴迪實在不容有失，華倫眾將個心去咗下周中之役亦無可厚非，對住弗到爆嘅馬體會，就算有地利都係信唔過。相反馬體會在歐霸B組頭３場贏晒，出線近在咫尺，可謂無後顧之憂，該隊於西甲已經連贏８場，與榜首巴塞同分，當中神鋒法卡奧亦有10球進帳，銳不可當，加上近５作客蝙蝠洞，馬體會只係輸過一次，喺抖足兼全力一戰下，絕對唔赦主隊，有得受讓梗係揀「讓球客勝」，若嫌分頭乏味的話，可捧平手盤客軍。