尹佩斯掉轉槍頭

猪拉多纳

呢兩個禮拜班英超迷肯定過足癮，繼上星期車路士火併曼聯後，今晚又有阿仙奴接力作客撼「紅魔」，今戰焦點當然落喺倒戈嘅尹佩斯身上啦，呢位荷蘭射手咁弗，家陣掉轉「槍」頭，阿仙奴會唔會重演上季作客輸2:8嘅慘劇？阿占唔敢肯定，始終「紅魔」條防線實在甩漏多多，既然係咁，都係捧1.54倍入球大最穩陣！

（有線200、204及300、廣東體育周六晚8:45直播）

呢場「雙紅會」話題多多，我哋有線梗係會有3D直播，等各位家庭觀眾可以近距離感受大戰氣氛啦！如果各位屋企有3D電視，記得撳去高清204捧場喇！
尹佩斯揸住7粒聯賽士哥

點解話今晚場波咁多話題？好簡單啫，阿占求其數都數到3個，尹佩斯倒戈就係人都知啦，仲有今仗執法球證甸恩，會唔會好似之前咁偏幫「紅魔」？而阿占最關心嘅，就係阿仙奴會唔會好似上季咁，作客慘輸2:8畀曼聯呢？

尹佩斯上季喺阿仙奴單天保至尊，佢今季跳槽曼聯令「廠迷」失望之餘，有啲人仲話佢係反骨仔添！點都好，尹佩斯一去到曼聯就適應落嚟係無可否認嘅事實，呢位荷蘭殺手家陣喺聯賽已經入咗7球，仲多過朗尼、查維亞靴南迪斯同香川真司三個加埋！今場香川仲喺度養傷，亦即係話曼聯要繼續靠尹佩斯數胡啦！
阿仙奴對雷丁都要失5粒

不過咁，雖然話曼聯家陣入咗24球，鋒力冠絕英超，但佢哋條防線真係仲衰過史雲斯，兩閘艾拉、拉菲爾達施華似翼鋒多過似後衞，中堅莊尼伊雲斯同里奧費迪南勁靠唔住，難怪「紅魔」已經連續4戰失2球或以上喇，計埋加時，曼聯仲衰到2仗合共失咗7球畀車仔添！

對家阿仙奴周中喺聯賽盃先落後4球、跟手再反勝雷丁7:5，對球迷嚟講梗係刺激啦，但雲格就唔係咁睇喇，對住雷丁都要失5球，對曼聯再失8球又有乜出奇？好在近排撞啱禾確特回勇，韋舒亞復出，「兵工廠」先冇咁甩皮甩骨，有多少本錢同曼聯鬥攻！咁嘅環境，今仗個入球大，分分鐘未夠20分鐘已經等收錢啦！
雙紅會矛盾「大」戰

‧曼聯連續9場賽事開出「入球大」。

‧阿仙奴近5場英超有4場先失球。

‧曼聯入24球英超最多，阿仙奴失6球全英超最少。
頂占筍盤：曼聯（入球大）

有線球彩台主持阿占

電郵：soccer64@cabletv.com.hk

面書球彩專頁：http://fb.com/icable64

PHONE波熱線：1831 678

「超級星期六」開放時間：周六晚10:00至周日凌晨3:30