車路士兵疲煲魚生粥補身

猪拉多纳

球員都係人，你估鐵打o架咩？車路士剛啱喺聯賽盃「降」魔復仇，唔少球員都搏足120分鐘，嚟緊周中仲有場關鍵嘅歐聯大戰，今晚造訪史雲斯唔排除會派部分副選上陣，睇個款唔似會大勝，博3.55倍「讓球和」仲好路。

（有線200及300、廣東體育周六晚11:00直播）
傳1月掟2億聘哥迪奧拿

車路士周中喺聯賽盃加時砌低曼聯，係就係出番啖氣，之不過鋒將桑馬達同一對中堅加利卡希爾、大衞雷斯都踢足120分鐘，正、副隊長泰利同林柏特今晚都分別因為停賽同受傷缺陣，下周中歐聯又要撼薩克達，主帥迪馬堤奧尋日坦承仲未度掂今晚嘅正選陣容，好可能睇埋最後一課操練，先決定派啲冇咁攰嘅球員落場喎！

之不過亨格比利就覺得迪馬堤奧喺排陣上唔會太玩嘢，事關尋晚《馬卡報》爆料，指一向都推崇巴塞踢法嘅車仔老闆阿布，計劃明年1月出價2,000萬歐元（約2億港元）聘用以哥迪奧拿為首嘅教練團加盟，仲承諾泵水畀哥帥斟人添，迪馬堤奧想留低梗係要繼續交出好成績啦！
史雲斯中堅捷高打柴

冇錯，「藍戰士」未必會「夫添」出擊，但睇見史雲斯近7場英超有6場失分，似乎好難做攔路虎喎！查實史雲斯周中喺聯賽盃都搏晒老命，踢咗利物浦出局係抵讚，但西班牙中堅捷高就喺呢場波打柴，領隊米高盧特立今晚焗住派蒙克落場，呢位隊長因為傷患今季都未試過喺聯賽擔正，加上門將禾姆因為鼠蹊受傷仲抖緊，車仔技高一籌，照計就算出副選都可以秤先。