莫連奴同阿布仲係friend

猪拉多纳

《最佳男主角》首次同大家見面，我哋搵來球壇猛人盡訴心中情，首期重量級嘉賓係葡萄牙寸爆名帥莫連奴，佢會大談名帥之苦！

皇馬教頭莫連奴被公認為世界級名帥，舉手投足都成傳媒焦點，但佢其實唔鍾意自己咁紅：「我唔鍾意自己日常社交生活受到影響，查實我有時都想做個普通人，睇吓自己個仔踢波，但原來唔得o架，一係有人黐埋嚟攞簽名同影相，再唔係有人兜口兜面鬧我，甚至連我個仔都鬧埋，咩事先！」莫帥為足球犧牲家庭生活，但出得嚟行預咗要還，佢只求收山後可以過番啲平淡日子：「我一直有同啲老友保持聯絡，當有一日我退出球壇，希望有幾年時間做個普通人啦。」佢唔鍾意私人生活，但又話想學老費教到70至75歲，擺明係又要威又要戴頭盔！
稱費格遜做boss

正所謂曹操都有知心友，莫連奴喺球壇樹敵無數，但同曼聯教頭費格遜關係勁好，談及老費，莫帥罕有地流露尊敬之情：「我叫佢做boss o架，點解，因為佢真係教練界大佬嘛，希望有朝一日返英格蘭教波嗰陣佢仲教緊曼聯啦！」老費亦好欣賞莫連奴，曾暗示想搵佢接班教曼聯，兩人惺惺相惜，堅friend！另外，江湖傳聞當年莫連奴同阿布拉莫域關係差先畀人炒魷，但佢強調兩人並冇心病：「梗係冇嘢啦，我哋係和平分手嘅最佳例子，依家仲有聯絡，我之前打畀阿布叫佢借艾辛畀我o架，不知幾老友！」佢同阿布到底係真朋友，定係假和好，大家自己諗喇！

去到訪問尾段，梗係要莫連奴分享個小秘密啦，佢尷尷尬尬咁表示：「我喺球場就也文也武，但返到屋企乜都聽晒老婆話，佢先係揸弗人！」唓，牛頭角順嫂都知你係老婆奴啦，敷衍！