威靈頓鳳凰長征難尋勝利

猪拉多纳

今日下午有澳職賽事，墨爾本勝利主場對威靈頓鳳凰，勝利今季經歷人腳大變動，令成績大受影響，幸好已開始建立隊形，表現亦日漸改善，絕對唔可以再睇小佢哋。尤其係鳳凰離開祖家新西蘭即刻腳軟，受讓亦冇着數，勝利讓平半要上盤。

（有線64及204台周一下午4時30分直播）
作客墨爾本未贏過

雖然勝利喺聯賽4戰3敗，但要留意其中兩場敗仗係作客輸畀上季總冠軍布里斯班獅吼，以及擁有前英格蘭國腳希斯基助陣嘅紐卡素噴射機，實屬非戰之罪。其實勝利演出已愈來愈對辦，前鋒艾奇湯臣及中場馬高洛查士都係高質素進攻球員，勝利不乏入波本錢。佢哋上次主場就擊敗今季表現大勇嘅阿德萊德聯，更加唔怕「客場蟲」鳳凰。

威靈頓鳳凰位處新西蘭，球員每次作客都要飽受舟車勞頓之苦，亦係佢哋客場成績差嘅主因，甚至未試過喺墨爾本贏波。鳳凰今仗仲有防線主力薛蒙特停賽，更難抵擋爭勝心切嘅勝利。