水晶宮升呢搶W賀新帥

猪拉多纳

今晚英冠大開快車，其中水晶宮於「新帥效應」下，主場可擊敗葉士域治！「光頭教頭」荷路維剛離開黑池轉教水晶宮，荷帥一向有料，有力帶領水軍更上一層樓；葉士域治雖剛贏波，但防守力弱頂唔住猛攻，捧主W！（周三凌晨4時開賽）

荷路維曾帶領黑池於10/11球季殺上英超，雖然最後未能護級成功，但球隊實際演出獲得一致好評。今次轉帶水晶宮，力足令新東家「升呢」。今場佢首次率領水晶宮，兼且又有主場之利，贏波成數好高。葉士域治上仗憑「新帥效應」贏波，但球隊後防實在太曳，今場輸得。

另一場布力般流浪作客哈特斯菲爾德，布力般新帥貝治剛落筆打三更，上仗作客不敵水晶宮，球隊今仗更會打醒十二分精神，哈軍實力追唔上布力般，捧受讓嘅布力般「讓球客勝」。最後揀埋白禮頓，球隊雖然連續七場不勝，但王牌射手馬卡爾史密夫上仗梅開二度，球隊狀態明顯冒升，今輪主場鬥彼德堡係時候贏番場。