緬恩斯做「大」騷

猪拉多纳

《江南Style》激發射手狂入波

緬恩斯今晚主場對紐倫堡，入球大抵玩。最近緬恩斯射手施沙拉爾紅到發紫，更自爆勁Hit嘅《江南Style》帶畀佢入球力量，撞啱紐倫堡嘅「新中田」清武弘嗣極速上位，兩大紅星碰頭入波唔會少！

（有線64及204、廣東體育周六凌晨3:30直播）
紐倫堡後防唔掂勁失波

開季後攻入8個聯賽入球嘅施沙拉爾，趁住祖奧莫亭同卡斯歷養傷彈起，近排佢接受訪問自爆，入波後衝向觀眾席「Un來Un去」慶祝，的確係《江南Style》舞步，仲話勁鍾意PSY嘅演繹，首歌入晒腦帶畀佢入球能量，要知道佢上季得3個聯賽入球，家陣難得順開點會畀佢停？

呢邊緬恩斯有施沙拉爾當旺，另一邊紐倫堡就有清武弘嗣發威，今季佢轉會後喺聯賽8次正選上陣，攻入1球交出4次助攻，外國傳媒甚至將佢同日本國寶中田英壽相提並論，除咗之前傳過多蒙特想斟佢，依家連羅馬同AC米蘭都有計劃搶人，覺得佢有條件喺意甲立足。

雖然紐倫堡連續3場開入球細，但其實後防好唔掂，對上8場有5場至少單場失兩球，但要留意嘅係，最近受到傷患困擾嘅曼聯中場香川真司，並冇入選最新日本國家隊大軍，即係話清武弘嗣有機會喺世盃外圍賽擔大旗，要成為頂級球星嘅話，依個時候當然要搏，信佢玩入球大！