阿仙奴「水貨」多雲格頭痕

猪拉多纳

睇番雲格初初執教阿仙奴影嘅相，再對比番依家，佢額頭上嘅電車軌真係勁多，可惜呢啲歲月痕迹得唔到回報，近期無論踢逆境定係順境波，「兵工廠」嘅表現周身唔聚財，倫敦打吡遇正爛頭蟀富咸又會陷於苦戰。
基奧特 普多斯基冇料到

先講對曼聯嗰場逆境波，阿仙奴喺奧脫福再次全場被壓制，而且毫無還擊之力，成場比賽基本上冇對曼聯後防造成威脅。雖然佢哋呢季英超防守力量有所加強，但鋒力始終一般，兩個箭頭基奧特同普多斯基，喺多場聯賽都冇建樹，直接影響班波整體信心。

講埋作客對史浩克場歐聯順境波，「兵工廠」Lead住兩球領先優勢都慘遭摸和，主隊下半場加快進攻節奏，唔畀阿仙奴有喘息機會，眼見畀對手圍攻，雲格並冇做出相應嘅戰術調整，成場畀對家射門22次，唔輸夠運！

由於阿仙奴限米煮限飯，英超多數球隊已經摸熟晒佢哋嘅進攻路數，更何況戰績低落，面對球迷責難，喺主場都背負沉重壓力，面對富咸全場緊迫加強防守，令到剛啱喺歐聯激戰完嘅阿仙奴疲於奔命。