意國攻兵大鬥法

猪拉多纳

重量級熱身擂台

今晚有兩場重量級國際熱身賽，分別係意大利主場對法國及荷蘭主場對德國。意軍自從柏蘭迪利執教後，摒棄傳統保守作風，大踢悅目性感足球，不但鋒線重用活力充沛嘅新星，今次連中場都幾乎清一色揀選技術型球員，擺明車馬演練進攻。法國主帥迪甘斯對意國足球瞭若指掌，相信手上亦有破敵之計，預料雙方可迅速入局火併，2.45倍入球大值博。

（now 633及660周四凌晨3時50分直播）

柏蘭迪利喺鋒線上除繼續棄用卡斯辛奴外，兩位高峰期已過嘅柏仙尼及基拿甸奴亦冇入選，以巴洛迪利、奧斯華度及基奧雲高為骨幹，再召入兩位當紅90後新星艾沙拉維及迪斯度。
柏蘭迪利盡點攻擊手

雖然奧斯華度因傷退隊，幸好艾沙拉維當勇，於意甲射手榜名列前茅，最重要係年輕、有鬥志，今仗有力擔正。至於巴洛迪利踢國家隊非常認真，事關柏帥極之重視紀律，「腦殘」為保席位，往往特別落力。

柏帥今次選人最特別之處係只有馬治斯奧屬於防守中場，其餘中場全屬踢法傾向進取嘅技術型球員，似乎刻意要試驗進攻組合。不過柏蘭迪利嘅進取戰術亦削弱意軍防線實力，上月世界盃外圍賽對弱隊阿美尼亞都失波，今仗遇上法國，好難保持清白之身。

法國雖然缺少皇家馬德里前鋒賓施馬，但仲有列貝利及近期頻頻入波嘅基奧特，最重要係領隊迪甘斯係一位「意大利通」，相信迪甘斯有把握搵到對手破綻，取得入球機會甚為樂觀，一於捧大盤。