日本強細作客

猪拉多纳

分組遙遙領先歎曼板

世界盃亞洲區外圍賽B組賽事，擂台躉日本作客阿曼贏波機會高，嫌客W冇分頭可捧細盤。「東洋武士」目前以10分高踞小組榜首，嚟緊只要穩穩陣陣，出線根本唔係問題，今仗喺主力香川真司缺陣下亦無謂冒進。阿曼主場滿座有力一砌，預料戰情膠着入波唔會多！（now 671周三晚7時30分直播）
客W大熱唔抵買

日本喺亞洲區實力大超班，依家喺B組面對澳洲、阿曼、約旦及伊拉克，根本冇受任何威脅，目前4戰3勝1和，以5分之差大幅拋離次席嘅澳洲，相信出線只係遲早問題。曼聯中場香川真司有傷今仗冇辦法落場，但領隊沙哲朗尼仍召入本田圭佑、宇佐美貴史及長谷部誠等大將，球隊依然夠晒卡士，預料贏波問題唔大。但係客W只得1.45倍，目前日本喺分數上遙遙領先下，作客和波都冇所謂，所以呢個賠率，似乎唔係咁抵買。
阿曼拚盡爭第2

日本陣中有多名主力喺歐洲搵食，目前歐洲各大聯賽正踢得如火如荼，好難要求呢啲外流球員吓吓去盡大炒對手；上場分組賽日本主場僅勝伊拉克1比0就係最好參考。翻查日本過往4次作客阿曼全數開細，而阿曼為爭小組第2，於全場爆滿嘅主場球迷吶喊助威下，必施渾身解數同日本周旋，預料今仗入波唔會多，細盤值得留意。