艾明費理念法蘭克福重生

猪拉多纳

今日Oliver想同大家講吓法蘭克福教練艾明費，呢位教頭過去執教生涯有起有落，最成功當然係2007年帶領年輕嘅史特加贏得德甲錦標，之後佢喺禾夫斯堡同漢堡都失敗過，主因係兩隊畀唔到足夠耐心同時間佢訓練球員，畀一班有名氣但未能達到佢要求嘅球員佢根本冇用，不過今時今日，佢終於搵到一間可以再度實踐佢理念嘅球會－法蘭克福。

艾明費嘅足球理念好簡單，以年輕球員為主，貫徹快速、一腳波、邊路反擊嘅體系，現時大部分球員喺上季德乙已經開始跟隨佢，上季尾已經踢出艾明費要求嘅風格，今季球隊人腳更完整，加上一班小將施巴斯坦真格、乾貴士、施巴斯坦魯迪同奇雲查普今季大熟勇進，尤其22歲門將奇雲查普，經過11輪聯賽後，佢喺德國傳媒評分甚至力壓艾達、紐亞同維丹費拿，係今季德甲評分最高門將，所以即使法蘭克福近幾仗戰績稍見回落，但Oliver堅信佢哋係今季德甲最強黑馬，好有機會攞到下屆歐洲賽參賽資格。
艾明費熟悉奧格斯堡

法蘭克福上仗作客拜仁雖敗但表現比預期更佳，今晚主場迎戰奧格斯堡（周六晚10時30分開賽），有足夠信心重響勝鼓，奧格斯堡上仗對多蒙特表現雖然都有亮點，但人腳配搭同攻守質素唔係法蘭克福嗰皮，今季展望都係志在護級，加上艾明費曾經長期効力同執教過奧格斯堡，對呢隊波知根知底，Oliver推介法蘭克福主Ｗ。
Oliver推介：

法蘭克福勝 ★★★★

拜仁慕尼黑讓球勝 ★★★★

慕遜加柏平手盤 ★★★