小豆更勝蘇B柏金

猪拉多纳

Peter成日都話守門員係後防最佳朋友，而門柱橫楣係守門員最佳朋友。上仗曼聯反勝阿士東維拉，唔單止係查維亞靴南迪斯嘅表演時間，更令曼聯軟弱後防唔使孭鑊。當日曼聯領隊費爵士見勢色唔對，即刻放「小豆」入場謀求突破，令到曼聯成功反勝。其實曼聯追成2比2之時，維拉已經散散地，相信有玩開即場投X嘅球迷都應該執唔少。當然啦，除咗要讚對費格遜夠果斷之外，亦不得不服「小豆」嘅威力。
走位活楔位靈

其實近十年八年，Peter都好少見過呢類超級後備殺手。就以英超為例，最有印象一定係挪威「娃娃臉」蘇斯克查同荷蘭人柏金，而Peter覺得「小豆」比佢兩個仲好用，呢類球員可遇不可求，具級數嘅真係一隻手數得晒。另外Peter有覺得小豆有3個優點係好難得，第一係佢態度好，打後備或正選都無所謂。第二係出場少但入球率高，總之你放得佢落場就一定交到貨。第三係走位活楔位靈，經常走到盲眼位搵入球機會。

基於好多大球隊都喺周末晚進行比賽，令到周日賽事戲碼較弱。建議球迷儲定子彈，留番周中歐洲賽，到時Peter定有好料。
金句：

小豆做咗紅魔

後防最佳朋友