沙紙搵銀紙輝哥入貨夠晒本

猪拉多纳

新西蘭今個禮拜二、三舉行為期兩日嘅卡拉卡兩歲馬拍賣會，吸引到本地接近一半練馬師出席，徐、呂、文、李四個倉主前日率先起程，尋日啲馬果然冇咩料到；至於留番喺度搏殺完先出發嘅就唔同嘞，好似葉楚航、姚本輝就齊齊靠徒弟坐騎執番W，輝哥第六場隻「沙紙」隔完紗，喺呂卓賢胯下贏到今季第2W，搵夠銀紙贊助阿頭呢次入貨之旅。
       
沙紙今季戰績梅花間竹，下仗莫非又……？

今季先出道嘅呂卓賢，近期表現愈見進步，昨日又施展放頭看家本領，幫「沙紙」再贏一場，自己頭馬數字累積到3W。姚本輝賽後話今場人馬都咁抵讚，「沙紙」暑期閹完成隻淡定成熟晒，今季喺三班千四贏兩場，之後有望繼續借助呂卓賢減十磅優勢再爭好成績；至於呂卓賢呢場走位非常機警，早段識得順應形勢變通，再略為催逼隻馬上前，霸住貼欄有利位置領跑，係贏馬最大關鍵。