飛哥應景11月先贏

猪拉多纳

新一屆2012香港國際馬匹拍賣會喺下個月8日舉行，每逢呢段時間，啲拍賣馬嘅演出都零舍醒神，好似尋日頭場就有身價達400萬嘅N布拍賣馬「飛哥」交功課，以大熱姿態打開勝利之門，幫拍賣會造勢之餘，仲同食咗八期白果嘅高伯新打破悶局，可算一吐烏氣。
       
飛哥第三次出賽終打開勝門。

之前兩鋪都做二奶嘅「飛哥」，原來英文名叫Fabulous November，咁啱隻馬真係等到11月先開齋，認真應景。聽馬主張祖同講，原來佢同另外兩個拍檔孫德懋、梁仕天都係11月生日，所以改咗呢個英文名，估唔到咁蹺真係11月先贏到。至於高伯新就話「飛哥」對上兩場一千米直路賽都係輸畀啲硬嘢，今次補中好合理，佢仲多謝馬會引入呢隻咁高質素嘅馬返嚟，又爆埋響口呢隻馬下個目標係下個月16日嘅1400米新馬錦標，希望繼續有好演出。