基輔開冷氣凍僵ＰＳＧ

猪拉多纳

歐聯A組餘下一個出線席位誰屬，好大機會由今輪基輔戴拿模主場對巴黎聖日耳門（PSG）一役決出。烏克蘭名牌球隊基輔戴拿模今場唔贏即出局，背水一戰鬥志肯定高昂，配合當地天氣寒冷，對客軍一班南美球星甚為不利，平手盤可博基輔戴拿模。

（周四凌晨3時45分開賽）

基輔搞到瀕臨出局，好大程度上因為作客分別不敵聖日耳門同波圖，其實佢哋主場取得一勝一和兼冇失波，絕對唔失禮。最重要係基輔天氣已愈來愈寒冷，近日溫度徘徊喺攝氏零度左右，西歐球隊前往當地比賽，隨時雙腳凍到僵硬，影響發揮。尤其係聖日耳門多南美兵，例如利尼、柏斯托尼、阿歷士洛里高及堤亞高施華等，短時間內好難適應寒冷天氣。
聖日耳門跌Watt

再者聖日耳門近期演出走樣，近三場聯賽竟然只得1和2負，已跌落法甲第3位，睇嚟呢支富豪球隊狀態尚須調整。加上佢哋就算今場輸波，出線機會仍然樂觀，戰意成疑，更加信唔過。

同組另一場波圖主場對克羅地亞球隊薩格勒布戴拿模，薩軍完全唔夠班踢歐聯，4戰全敗共失10球兼冇波入，輸到信心盡失，今仗造訪葡萄牙，隨時又被大炒，讓球主客和波圖讓兩球照要「讓球主勝」。
PSG唔輸就得

歐聯A組形勢簡單，波圖已獲出線權，薩格勒布戴拿模4戰全敗，已經提早出局。巴黎聖日耳門今仗作客基輔戴拿模，只要唔輸就可以晉級，反觀基輔則必須全取3分，先至可以保持出線希望。即使聖日耳門今仗輸波，只要最後一輪主場擊敗波圖，亦可以出線。