悉尼難抗阿德萊德聯

猪拉多纳

迪比亞路入埋唔夠後面輸

今日澳職獨腳戲由迪比亞路領銜主演，帶領FC悉尼主場迎戰阿德萊德聯。悉尼近期貪勝不知輸，連續幾場潰敗，今場對住攻守兼備嘅聯賽「一哥」阿德萊德聯，睇嚟迪比亞路都要做多次落敗者角色，2.4倍客勝要捧！

（有線64及204周五下午4:30直播）
澳職「一哥」攻守掂 主力續約

迪比亞路空降澳職就如虎入羊群，喺FC悉尼打咗7場轟入5球，可惜班波往往壓得太上，搞到防線風聲鶴唳，落得3連敗下場之餘仲要喪失14球，成為目前聯賽失波最多嘅球隊。雖然教練哥列卡放風話居連拿、安東尼斯同格菲斯幾名主力可以復出，但名氣最響、最具實力嘅前澳洲國腳居連拿，足足抖咗成年，比賽狀態同作用實屬疑問，未必幫到球隊幾多。

相反，聯賽失波最少嘅阿德萊德聯，除咗中堅伊恩費菲講明要嘜到迪比亞路冇啖好食之外，効力多年嘅左閘荷西卡斯奧宣布續約兩年，亦能夠刺激球隊士氣。再者，同箭頭摩拉利斯紐曼包辦8成入波嘅維度錫，踢埋呢場就要同門將加利高域、中場奧沙麥馬歷齊齊跟隨澳洲備戰東亞盃外圍賽，今日實出盡百二分力求勝。