諾域治頂住得愛華頓

猪拉多纳

門將魯迪千手觀音上身

車路士周中歐聯輸波，領隊迪馬堤奧即刻執包袱，多年嚟車仔領隊車輪轉已經見慣，反而愛華頓就相反，莫耶斯教咗十年以上，加上依家「拖肥糖」長居前列，個帥位穩如泰山。今晚愛華頓會喺主場迎戰氣勢如虹嘅諾域治，雖然主勝熱透，但小妹認為開出主勝有難度。

（有線301及201台周六晚11時直播）

「金絲雀」諾域治近排好似食咗大力菜咁，上星期爆冷喺主場贏咗曼聯，近六場有四勝兩和不敗，狀態一流！不過佢哋好似「門口狗」，贏波只限於主場，一作客就會出現攻力疲弱呢個毛病。

諾域治喺聯賽作客未贏過，平均兩場作客先至轟入一球，好在近日防守出色，已經連續三場保持冇失球，門將魯迪好似「千手觀音」上身咁，所以今場即使未必可以攻破愛華頓大門，「金絲雀」班後防都可以頂得住！聽講嚟緊一月轉會窗重開，諾域治就會積極增強兵力，特別係針對前線人手不足嘅問題，効力緊美職嘅羅比堅尼會係頭號收購目標，大家要留意佢哋一月嘅動作喇！
費蘭尼停賽 主隊打折扣

愛華頓今晚一定要好好看管對方嘅格蘭荷特，呢位高大前鋒雖然只得三個聯賽入球，但呢三球分別係來自對阿仙奴、車仔同利物浦，就知佢專收強隊後防！今場主隊最大隱憂就係中場費蘭尼要停賽，攻力大打折扣，入波重任就轉咗去次席射手、克羅地亞嘅謝拉域身上。

愛華頓今季主場不敗，依家亦排緊第五，走勢不俗。不過呢場有主力缺陣，而對手近日氣勢又強勁，主勝熱到1.4倍左右，小妹認為唔值得投X，反而「讓球客勝」比較博得過。
Wendy推介：諾域治讓球勝