AC米蘭四分五裂難抗祖記

猪拉多纳

AC米蘭今晚主場鬥祖雲達斯，戲碼就梗係冇得頂啦，但睇見雙方喺意甲積分榜有成17分差距，都知AC已經今非昔比！祖雲達斯跨季不敗走勢斷纜之後，表現火速重上正軌，要砌低陣營四分五裂嘅「紅黑兵團」冇難度，作客讓平半都要上盤。

（開賽時間：周一凌晨3:45）

隨着本月頭輸畀國米，祖記嘅49場跨季不敗走勢正式Game Over，係就係可惜啲，但冇咗呢個沉重包袱無疑會令球員壓力細啲，上周中歐聯就大炒車路士3蛋鎖定出線資格，就連小腿有傷嘅悍將基亞連尼都已經復操，氣勢唔錯吖！
柏圖 岩布仙尼齊喊走人

20年前嘅今日，雲巴士頓喺歐冠（歐聯前身）對哥登堡大四喜，會方為紀念呢個大日子，已經落實搵咗呢位荷蘭名將重返聖西路睇今晚場波，但睇怕雲巴士頓會掃興嘞！

事關AC近4場聯賽贏得1場咁大把，前鋒柏圖不滿冇正選要離隊，隊長岩布仙尼又話球會唔尊重佢，計劃季尾唔續約走人，內部氣氛真係麻麻。學祖雲達斯前鋒基奧雲高賽前話齋：「艾沙拉維等如AC米蘭！」即係凍結到呢位射手嘅話，AC就已經冇晒爭勝板斧，寸嘴成咁睇嚟好有信心造低AC喎！