拜仁造勢強爆弗賴堡

猪拉多纳

相信各位德甲躉同小妹一樣，都相當期待周末拜仁對多蒙特嘅超級大戰，但兩軍喺周中都各有一關要過！拜仁今晚會作客弗賴堡，雖然對手5場不敗頗為強勢，但客軍班正選同後備陣容一樣咁掂，就算今場略作輪換都仍然夠殺，當然捧1.9倍「讓客」啦！

（有線61及中央5台周四凌晨3:00直播）
弗賴堡後衞穆迪薩停賽

拜仁之前喺歐聯人多打人少都只能逼和華倫西亞，結果畀會長路明尼加公開喪插，連列貝利都話「勁冇癮」！好彩呢支德甲班霸都算知碇，上仗聯賽對漢諾威即刻大勝一場，相信今晚佢哋都會醒醒定定大炒一場，喺大戰前夕造勢。雖然文迪蘇傑近排狀態唔多弗，但啱啱復出嘅馬里奧高美斯上場後備入替唔夠30秒就有波入，比沙路亦都係有質素嘅前鋒，加埋中場嘅梳頓沙基利同埋「遠射王」卻奧斯等，就算今仗畀文迪蘇傑抖抖，仍然有大把進攻本錢。

弗賴堡現時排喺聯賽榜第6位，令人眼前一亮，但佢哋嘅主場戰績就唔算太突出，近3次喺自己地頭出戰，得上仗對史特加表現叫做好啲，而且早排迎戰多蒙特同雲達不來梅呢啲較強嘅隊伍都輸波收場，今次鬥拜仁仲要有後衞穆迪薩停賽，睇怕都唔會有好結果喇。