撐碧咸！撐銀河！

猪拉多纳

捧盃冧莊 完美送別萬人迷

本年度美職總決賽由洛杉磯銀河主場對侯斯頓戴拿模。今場唔單止係銀河衞冕終極戰，亦都係天王巨星碧咸為銀河上陣嘅最後一場比賽。自從呢位球星落戶美國後，美職受重視程度可謂大幅提升。咸哥對美國足運作出咁大貢獻，相信好多球迷都希望佢可以協助銀河成功蟬聯總冠軍，為佢嘅美職生涯畫下完美句號，巨高呢場一於力撐銀河主W。

（周日清晨5時30分開賽，馬會網上文字直播）
當路雲亦將離隊

為推廣足運，碧咸07年毅然離開西甲名牌皇家馬德里前往北美大陸發展，為死氣沉沉嘅美職注入生氣，亦使到地球上更多人關注美職賽事。如果碧咸只係一個足球員，根本唔會有咁強勁嘅宣傳效果，但大家都知碧咸唔係球員咁簡單，佢根本就係一粒超級巨星，有佢嘅地方就會發光發亮，試問當今世上有邊個球員有如斯吸引力？

今場為咸哥「銀河終極之戰」，相信陣中所有球員包括羅比堅尼、韋希姆臣及馬基等都會竭盡所能，將冠軍獎盃送畀碧咸做紀念。而除碧咸之外，陣中另一名將當路雲亦盛傳會於總決賽後離隊。當路雲亦為美職付出過唔少血汗，大受當地球迷所歡迎及愛戴。
侯斯頓無力搞局

老實講，今次一場過總決賽已成為兩位大哥嘅告別賽，加上又喺番主場賀姆體育中心舉行，呢個歡送派對肯定會係Happy Ending，侯斯頓戴拿模只不過以嘉賓身份出席，點會去搞寸個Party咁衰仔喎？事實上，論實力亦係銀河勝一籌，加上有主場之利，主W好路。