拉素當勇追殺帕爾馬

猪拉多纳

今晚意甲Ali首選場次係拉素主場對帕爾馬，拉素近期愈戰愈勇，主場有力擊退不擅作客兼唔齊人嘅帕爾馬，1.64倍主Ｗ值得捧場。（周日晚10時開賽）
帕爾馬作客極曳

拉素目前只落後榜首祖雲達斯6分，會方目標已定於爭取前3名搶得下屆歐聯參賽資格，不過Ali認為只要佢哋跟住落嚟冇傷病問題，甚至有力挑戰聯賽錦標，佢哋上周中喺聯賽大炒烏甸尼斯3蛋，仲射失咗一球12碼，呢班波同其他意甲球隊不同之處，係領先咗都唔會縮，而且近況真係勇，聯賽同歐霸兩線作戰，近5場比賽3勝2和，對手仲包括勁旅羅馬、祖雲達斯同熱刺，今仗中場靈魂靴蘭尼斯傷愈復出，主場爭勝更有把握。

對手帕爾馬喺鄧納東尼領導下亦有好表現，目前排聯賽第8，不過佢哋一向靠主場搵食，今季7場作客只攞到5分認真曳，今仗又有中場加路柏因傷缺陣，箭頭杜蘭柏邦因家事請假，作客唔夠拉素砌。

Ali 推介：

拉素勝 ★★★★

拿玻里讓球勝 ★★★

羅馬上盤 ★★★