費蘭尼頂得靠陣除

猪拉多纳

今期《最佳男主角》，好開心搵到目前英超最當時得令嘅費蘭尼上嚟受訪。呢名愛華頓球星，今季畀領隊莫耶斯成功改造，由防守中場改踢前鋒，入波一個接一個，依家畀一眾富豪球會（目及）到實。不過佢勁謙，喺訪問中不斷重申自己只係個普通人。想知佢有幾「普通」？睇埋落去就知！

咪睇費蘭尼大大份、擁有6呎4吋巨人身材，但原來佢好斯文，講嘢陰聲細氣。雖然踢前鋒掂過碌蔗，但佢就冇認叻：「領隊覺得我踢到10號（前鋒）、8號（攻中）同6號（防中）位，我踢邊都冇所謂。但其實呢，背住個龍門踢波真係好難，始終都係踢防中啱我。」

之前有報道指，費蘭尼希望踢埋今季轉會，但依家就轉口風：「係愛華頓畀咗好多機會我，而且隊友亦好友善，所以留隊都冇所謂。」諗番起啱啱到英格蘭搵食，「爆炸頭」擰晒頭：「我冇語言天份，其實現時英文都係麻麻，所以初來報到好慘，同人溝通唔到。但我係宅男嚟，依家練完波都係匿埋喺屋企，睇《天空體育》節目。」嘩，咁即係一日24小時都係足球，都咪話唔悶！
自爆間中先洗頭

費蘭尼話自己雖然係英超球員，但只係普通人一個：「你睇我都係揸歐寶小房車，就知我有幾普通啦。」節目去到最後，都要佢爆個小秘密：「其實我細佬都係留『爆炸頭』，點解？因為夠方便囉，我好得閒時先洗頭o架咋！」咁多英超後衞唔夠佢頂，唔知係咪驚咗佢陣除呢？