日月霸王開齋喇！

猪拉多纳

蘇保羅近期頻頻有頭馬見面，心情靚晒，而佢父母蘇禮雲伉儷日前從新西蘭來港，尋日專誠入場為乖仔打氣，蘇保羅不負雙親所望，喺第五場憑大熱門「日月霸王」勝出今季第八W，兼為呢匹處女馬打開勝利之門。雖然第六場嘅「金碧陽光」臨場落重飛至大熱門僅得第三，但全日出三駒獲一勝一位，表現相當唔錯。
       
日月霸王憑形勢之助打開勝門。

「日月霸王」苦戰至第19仗終於打開勝利之門，蘇保羅話呢匹低班馬極需形勢之助，尋日朝佢就特登落場行下泥地跑道，確定場地對呢匹放頭馬非常有利，所以十分有信心，唔難之得熱到2.8倍開齋啦！不過「日月霸王」呢場大勝五乘多，難免會被大幅加分，蘇保羅笑言如果評磅員手下留情，遇有利形勢仍可再爭好成績。