蒙特雷蔚山現代半場講和

猪拉多纳

另一場世界冠軍球會盃，亞洲冠軍南韓蔚山現代今午與來自墨西哥嘅中北美洲盟主蒙特雷爭入四強，蒙特雷陣中雖有智利國腳漢拔圖蘇亞素、前里昂中場施薩迪加度助陣，不過經過舟車勞頓，要喺一時三刻咬入由應屆亞洲足球先生李根鎬領軍嘅現代並唔容易，預料比賽初段會處於膠着狀態，波童首選1.92倍「半場和」。

（有線61及201台周日下午3時直播）

今屆係蒙特雷連續第二年參加世冠盃，去年佢哋喺半準決賽同日職柏雷素爾踢成一比一，然後於互射十二碼階段飲恨。再對上一屆，另一支墨西哥勁旅，帕丘卡亦在此階段不敵非洲隊伍馬贊比，成績唔好相信跟球隊需要穿州過省比賽有關，球員一旦適應唔到時差，初期未能發揮水準都好正常。
現代上番力下盤抵玩

蔚山現代贏完亞冠盃後，比賽集中力稍見不足，搞到連續四場聯賽贏唔到，不過隨着世冠盃來臨，球隊近兩場連贏釜山偶像、FC慶南已恢復應有水準，除新鮮出爐嘅亞洲足球先生李根鎬之外，陣中仲有前大阪飛腳前鋒拉芬夏，呢名巴西射手係現代捧走亞冠盃嘅主要功臣，絕對有力威脅蒙特雷大門，除捧「半場和」之外，受讓平半嘅現代下盤都值得一試。