正氣利雲特主Ｗ餸晚飯

猪拉多纳

今晚西甲早場有好嘢，「小蝙蝠」利雲特戰績穩步上揚，唔單止喺歐霸順利出線，甚至有力爭逐前四嘅歐聯席位，今仗主場迎戰每況愈下嘅馬略卡，仲唔打落水狗踩多兩腳咩，一於捧主勝，食住晚飯等收錢都咪話唔盞。

（now 632周日晚7時直播）

雖然上季利雲特表現出色，但喺星散情況下，今季能keep住咁好成績，實在難得，不得不佩服該隊搵人嘅眼光，除咗睇中失意前鋒馬田斯外，幾位平價貨如柏度里奧斯、安祖路爾斯、米高米基爾均發揮餘熱，加上90後本土前鋒羅渣馬迪極速崛起，上輪作客切爾達完場前扳平，連續兩場有士哥，前途無限。事實上，利雲特係名副其實嘅豬頭骨，作客遇同級唔易輸，除了對皇馬、巴塞之外，主場應贏則贏，因此愛斯賓奴、皇家蘇斯達、CF格蘭納達均成為刀下亡魂，連同市死敵華倫西亞都要向其俯首稱臣，非常正氣。
馬略卡殘陣態沉

睇番積分榜，利雲特依家只係差第四位嘅貝迪斯四分，要爭歐聯席位並非癡人說夢。相反，馬略卡愈踢愈曳，連續十一仗未嘗一勝，仲輸足七場，真係見到都反晒胃，射手希密特近期熄晒火，球員信心跌至谷底，今仗更有主力祖奧域陀同查維馬基斯倦勤，殘陣兼士氣低落下，作客想搶一分都難，利雲特個主勝有1.82倍，係斯維是日信心之選。