德軍抬頭因為有得抖

猪拉多纳

兩項歐洲錦標都進行過分組賽，德甲球隊就攞滿分嘞！全部球隊都取得出線席位，認真叻仔。Peter覺得德甲足球水平已大幅回升，現時已經可與西甲及英超分庭抗禮。其實德甲能夠反彈唔係乜嘢大秘密，佢哋有好多正面因素令水平提升。其中2006年由德國主辦世界盃決賽周，可謂關鍵因素。

當年德國為搞世界盃，主辦單位將所有硬件大幅「升呢」，特別係足球用地方面。而當世界盃完結之後，大量先進訓練場地留畀民間使用，對於足運發展必有幫助。大家都知德國屬科技強國，而職業球隊亦不斷引入新操練方法及電子器材，以提升球員體格及狀態。就好似多蒙特，教練高普經常使用嶄新方法去訓練球員。據悉佢會安排球員進入密室踢足球，以訓練球員反應。
英超和波3串4

另外，賽程上亦有利於德甲球隊喺歐洲賽爭好成績。本身德甲只有十八支球隊，比較起其他頂級聯賽少兩隊，賽程自然冇西甲及英超咁頻密。加上佢哋只得德國盃，仲係一round過決勝負，唔似得英倫球隊要兼顧足總盃及聯賽盃。德甲球員比賽數量較少之外，仲有埋個歇冬期「叉電」，令到球員有更充裕體力去應付歐洲賽。

周日有三場英超舉行，Peter覺得三場都係形勢均等嘅場合，不妨整番條和波3串4過關玩吓！
金句：德國足球反彈係鐵一般事實