曼聯狂鋒 吹走藍月亮

猪拉多纳

雙王箭頭威盡英超

英超今晚上演曼徹斯特打吡兼榜首大戰，上季畀曼城雙殺兼搶埋冠軍寶座嘅曼聯，今季捲土重來氣勢勁爆，憑住前線無敵新組合「入球王」尹佩斯加「助攻王」朗尼，可謂無堅不摧，目前喺榜首帶甩「藍月亮」3分，今晚強勢出訪曼城以攻為守唔難復仇成功，受讓平半，梗係捧1.97倍下盤。

（有線200、204（3D）及300、廣東體育周日晚9:30直播）

紅魔今季喺英超展現超強火力，踢完15輪轟入37球，喺英超比第2多嘅曼城同熱刺（28球）多一大截。翻查歷史，曼聯只曾喺00/01球季取得比今季更多嘅39球，依家嘅攻擊組合的確相當得人驚。
紅魔神射手搭No.1助攻王

要數曼聯火力大爆發，關鍵人物當然係今季由阿仙奴加盟嘅尹佩斯，佢目前入咗10粒，今輪之前，佢同蘇亞雷斯、米捷同丹巴巴亞並列射手榜首席，最緊要係佢仲有個好拍檔朗尼，「魔童」今季喺聯賽已經交出7次助攻，又係英超No.1，試問曼城今晚點頂？

當然，曼聯今晚仲有包括拿尼、香川真司同尼曼查維迪等主力缺陣，新星中場湯卡華利又話喺上周中對克盧日一戰小腿受傷，今晚唔踢得，不過以佢哋雄厚班底唔難搵替補啦！再者，曼聯上季喺聯賽分別主場輸1:6同作客輸0:1，咁鬼羞家，依家難得撞正曼城狀態麻麻，仲唔趁佢病攞佢命咩？
曼城近5戰得1勝

主隊「藍月亮」啱啱喺歐聯出局，班波士氣唔掂。睇番近績，近5場波竟然只得1勝3和1負，都算衰得貼地。領隊文仙尼帥位愈嚟愈危，始終佢嘅應變能力唔多掂，點同「老狐狸」費Sir撼吖？！佢哋今仗仲要勉強谷起中場大衞施華同左閘基捷基治，希望佢哋趕及傷愈復出，狀態有幾多好難講，就算話有地利，想贏呢場歷史上第164次曼市打吡都唔係咁易。
曼城今季英超不敗

‧曼城今季聯賽未輸過。

‧曼聯今季聯賽賽事8成開大。

‧近6次曼城主場對曼聯取得2勝1和3負。

‧兩隊近6次對賽4場開大。
曼聯後防唔掂「大」件事

今晚舉行嘅曼市打吡基本上係冠軍前哨戰，事關兩隊已拋離其他對手至少7分，為咗爭標一定搏晒老命。曼聯今季鋒力強勁，單係喺周中歐聯休息嘅尹佩斯已經係入球保證。不過佢哋防守唔掂，尼曼查維迪未必出，里奧費迪南、艾拉不復當年勇，弱如雷丁都可以入3粒，更何況遇上級數高幾班嘅阿古路、泰維斯？開大無難度。