愛華頓齊腳打鐵趁「熱」

猪拉多纳

搏盡擊敗彭拿典奈高斯躋身歐霸盃32強嘅熱刺，大戰過後重返英超作客喺葛迪遜公園球場硬淨到爆嘅愛華頓，受傷兵潮拖累替補無人，球員隨時體力不繼，1.78倍「拖肥糖」主勝抵撐。

（有線201及301周日晚11:00直播）
熱刺傷兵問題嚴重

連埋大炒彭拿典奈高斯嗰場，熱刺締造4連勝氣勢真係唔錯，加上出戰歐霸盃後嘅頭5輪英超贏4輸1，睇落歐洲賽對佢哋嘅影響唔大，不過4場贏波當中3場有主場之利外，剩番就係對魚腩修咸頓，相反作客曼城即時露晒餡輸波。今晚左閘伊高圖、中堅卡保奧、戴臣、中場加里夫巴利同柏加都仲未出得番，冇乜替補選擇，用同一班波連搏兩場，踢落隨時腳仔軟。

雖然拖肥糖連續3場打和1:1、近4場波未贏過，不過米拿拉斯同史密斯高文一對右路攻守球員傷愈復出，就令保持主場不敗金身嘅佢哋陣容更為完整兼夾增加贏波本錢。而且領隊莫耶斯賽前受訪嗰陣話，今晚成功挑戰熱刺嘅話，對於班波重返歐洲賽場嘅機會就好大，即係落柯打叫費蘭尼、謝拉域同巴尼斯班主力搏盡攞3分啦！