博洛彈起夠惡收「素」

猪拉多纳

今晚仲有兩場意甲，重心推介尾場博洛尼亞主場對拉素，博洛尼亞演出大反彈，主場出擊更3連勝。拉素表面上排名高一大截，但呢支首都球隊離開自己地頭，往往冇料到，最大鑊係首席射手高路斯有傷在身，好大機會缺陣。平手盤寧要當頭起嘅主隊。

（周二凌晨4時開賽）

博洛尼亞早前一度跌至尾二，陷入降班漩渦，球隊開始有危機感，近期大踢爭氣波，近3場聯賽贏咗2場，一對進攻組合迪亞文迪同基拿甸奴，表現非常合拍，成為球隊谷底反彈關鍵。博洛尼亞自知斤両有限，往往集中力量喺主場搶分。事實上，佢哋今季7場聯賽主場，只係輸過畀米蘭雙雄，無懼拉素來犯。

至於拉素近期頻頻奏捷，但絕大部分勝仗都係主場賽事，睇番佢哋近5場聯賽作客僅1勝，而且其中4場冇波入，加上射手高路斯因傷倦勤，更難攻破主隊大門。平手盤要博洛尼亞，可坐和望贏。
烏甸攰爆撐森多

頭場森多利亞主場對烏甸尼斯，烏甸今季畀歐洲賽拖跨，球員疲態畢露，恐怕歇冬前都冇運行，反觀森多利亞表現復甦，平手盤可以一試。