賓菲加有錢賺「士」氣高

猪拉多纳

今晚葡超上演里斯本打吡，喺歐聯力戰巴塞嘅賓菲加，最終無緣晉級搞到谷埋一肚氣，作客士砵亭實搵對手祭旗之餘，球會錄得高額淨盈利亦有助刺激士氣，睇好佢哋可以延續聯賽連勝氣勢，1.85倍客W要撐。

（開賽時間：周二凌晨4:15）
里斯本打吡搵士砵亭出氣

講真，賓菲加作客魯營已經交足貨，可惜最終都係要降格打歐霸盃，卡爾萬都戥佢哋唔抵，不過賓菲加至今聯賽未輸過不特止，仲打出一段6連勝氣勢，同以7球位列首席射手嘅奧斯卡卡度素同洛迪高利馬更齊齊擔正攻堅，火力有保證。再者，季初賣走韋素同查維加西亞，為球會上半年帶嚟2,420萬歐元（約2.4億港元）嘅淨盈利更有助振奮士氣，今晚正好畀機會佢哋一洩歐聯悶氣。

雖然士砵亭喺葡超同歐霸盃連續8場主場不敗，不過喺歐霸盃分組墊底出局嘅佢哋，最後擊敗維迪奧頓只係叫做攞番少少面子，今晚又有中場謝法倫、伊斯米洛夫同般奴彭利連拿繼續養傷缺陣，連歐霸都踢唔掂嘅佢哋對住歐聯級數嘅賓菲加，又點夠對手砌？