法甲快車華倫西恩斯黎料

猪拉多纳

法甲周中開快車，周三凌晨率先上演三場賽事，重頭戲有巴黎聖日耳門作客華倫西恩斯。華倫西恩斯向來遇強愈強，以聖日耳門今季聯賽作客表現冇必勝把握，「讓球主客和」巴讓一球，必捧「讓球主勝」。（now 714周三凌晨2時直播）

講名氣，華倫西恩斯雖然唔及聖日耳門，不過佢哋目前喺聯賽榜其實只落後巴軍3分。佢哋有咁好成績，主要原因係發揮穩定，除咗開季8場主場聯賽未輸過，就算4次作客輸波，全部都係僅負1球，表現甚少走樣，而且球隊今季入球分布夠平均，除三大射手卡迪亞、勒泰歷及佩祖爾合共攻入15球，其餘前場球員阿布巴卡、丹歷、山齊士摩蘭奴及馬菲奧杜斯維都具破關能力，目前能以29球跟里昂並列為聯賽入波最多球隊甚具說服力。
聖日耳門作客讓波危

聖日耳門入球數字比華倫西恩斯少1球，攻力看似不相伯仲，不過佢哋入波過分集中在伊巴謙莫域身上，佔全隊5成，一旦佢有咩頭暈身熱，肯定會影響球隊整體演出，況且唔計歐洲賽，佢哋過去4場作客聯賽只贏過包尾嘅南錫，就算伊巴瘋狂入波都唔係贏波保證，客軍讓波捧唔過。