聖日耳門平內亂再搶W

猪拉多纳

法甲巴黎聖日耳門上星期擺完餐「和頭酒」，搞掂番晒內部關係，即刻展現番強隊本色取得2連勝，以佢哋超班實力，今晚作客近況回落嘅華倫西恩斯3分唔難手到拿來，我捧1.85倍客勝。（now714台周三凌晨2:00直播）
華倫西恩斯近況回落

之前傳出內訌嘅聖日耳門，主帥安察洛堤上星期安排成班人放低成見食餐飯，自然咩到傾掂數。本來話唔妥嘅法國幫同意大利幫，已經冰釋前嫌；成日唔滿意伊巴謙莫域獨食嘅柏斯托尼，終於搞番掂二人關係，柏斯托尼亦話拒絕米蘭隻雄邀請，堅決留隊，難怪即刻取得兩連勝。肥安話：「其實早排戰績差根本唔關踢4231定442事，一切只係同球員態度有關。」一向對紀律要求極高嘅佢，上周末仲將唔滿意做後備嘅巴西中場麻煩友利尼擺入雪櫃，試問依家仲邊有人敢搞搞震？

華倫西恩斯呢邊，依家排第5已經係超出預期，不過班波近4戰仲要只得1勝2和1負，最慘係呢班波想搵粒星孭飛，帶領球隊走出低谷都冇，今晚就算主場出擊，睇怕都係凶多吉少。