新加坡煲魚生粥酬「賓」

猪拉多纳

東南亞錦標賽今晚上演4強次回合，爭標熱門新加坡會回師主場恭候菲律賓，首回合雖然打成0:0，但戰況一面倒以「獅城」佔優，預期今仗劇本都差唔多。嚟到緊張關頭仲要作客，預期菲律賓會先求穩守，把握力唔算強嘅新加坡睇落似會煲魚生粥，3.2倍「讓球和」好路。

（now671台周三晚8:00直播）

首回合雙方互交白卷，作客嘅新加坡幾乎由頭攻到尾，奈何沙丹蘇拉文門前10碼射高、安姆利射中網側、伊錫同杜歷治亦分別錯失良機，都唔知嘥咗幾多黃金「餐士」，把握力曳成咁，就算話今日夫添出擊，想淨贏菲律賓兩粒似乎窄窄哋喎！
菲律賓望爭作客入球

畢竟菲律賓由分組賽至今有3場保持清白之身，剛啱畀班國腳放咗一日假，同家人食飯叉電嘅領隊米高韋爾斯，賽前仲漏咗口風，話今鋪只要爭取1個「有比數嘅和波戰果」就完成任務，一心想靠作客入球優惠偷雞過關，擺到明想打穩守突擊，進取極有限，今鋪博新加坡小勝1粒啱數。

首回合：新客和0:0
賽制：

採主客兩回合淘汰制，今輪為4強次回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。