聖保羅堤格雷鬥死火

猪拉多纳

南球盃爆發「細」紀終極戰

南美球會盃決賽次回合聽朝上演，巴甲代表聖保羅會喺主場恭候阿根廷球隊堤格雷，論近況當然以15場主場不敗嘅聖保羅秤先，弊在主勝熱到得1.33倍，冇乜肉食，小妹寧願轉捧1.75倍入球細，博缺少王牌射手嘅主隊同火力不濟嘅堤格雷合演一場悶戰喇！

（有線61及201周四早上7:50直播）
聖保羅法比安奴停賽

上星期首回合，兩軍只能踢成0:0，雖然冇波入，但焦點就去晒路爾斯法比安奴身上！話說佢開波10分鐘左右同堤格雷守將當拿迪嗌交，仲忍唔住起腳踢對方，雖然踢唔中，好衰唔衰「影帝」當拿迪依然交足戲碌晒地，結果球證就趕咗法比安奴出場！冇咗今季入咗17球嘅法比安奴，聖保羅火力即時大減！

睇番聖保羅喺今屆南球盃嘅紀錄，至今9戰開足8場入球細，聽朝嚟到決賽，肯定更加步步為營，唔會攻得太盡喇。而且論往績，阿根廷球隊拎過5次南球盃冠軍，巴西球隊就得1次，但係今屆隊堤格雷喺阿甲排緊尾2，近8仗只得1勝兼有6場開細，近3戰亦淨係入得嗰1球咁大把，火力不足自然會穩守為先，睇怕南球盃近3屆決賽次回合都開大嘅走勢，都要告一段落喇。

首回合：聖客和0:0
南球盃賽制

採主客兩回合淘汰制，今輪為決賽次回合，不設作客入球優惠，若總比數相同，會於次回合後加時作賽，再和就互射12碼決勝。