紅魔捉貓「細」抵玩過Ｗ

猪拉多纳

死對頭前後腳出擊

上周鍊完打吡戰嘅曼市雙雄，今晚英超分途出擊。近況麻麻嘅曼城頭頂雖然滿布密雲，但今晚頭場客戰私房菜紐卡素，有力憑較佳質素及格食格衝破陰霾，客W值博；至於衝冠前景一片光明嘅曼聯，則於稍後時間主場迎戰「黑貓」新特蘭，「紅魔」已經弗咗一排，大細中位數去到3.5球咁辣，不妨揀番個「細」。

英超一哥曼聯有隊長尼曼查維迪休戰超過3個月，今晚對新特蘭可望復出鎮守後防，「紅魔鬼」今季攻強守弱，呢次難得防線齊腳，大可穩中求勝，佢哋近季同新特蘭交手入波偏少，今場大細中位數改成3.5球，細盤穩陣！

（有線300及200台周六晚11時直播）

曼聯上周喺打吡戰擊敗曼城將榜首優勢增至6分，但又一次失兩粒，無論教頭費格遜點鬧都好，後防問題都係冇乜改善。不過，佢哋終於等到救星回歸喇，隊長尼曼查維迪已經好番，今場可以復任正選，呢位塞爾維亞球星抖咗3個幾月，條防線衰足咁耐，家陣佢可以同最佳拍檔里奧費迪南扼守中路，「紅魔鬼」最強防線再現，有望止血。但新特蘭唔會好似曼城咁殺出嚟同佢哋鬥攻，若想撕破對手密集防線，要勁有耐性先掂，主勝熱到冇肉食，實在唔多抵玩。
新特蘭對戰少大敗

新特蘭曾幾何時被封為曼聯二隊，隨住奧尼爾取代布魯士領軍，呢陣曼聯味已經逐漸減退，現時隊內只得守將奧沙較受到重用。「黑貓」一向擅守唔擅攻，對住曼聯呢類勁旅都係專心縮後打突擊。翻查往績，新特蘭近6次作客奧脫福錄得2和4負，當中有3場輸0比1，6戰僅得1場總入球多過3球，預期曼聯小勝機會高，捧細。

猪拉多纳