水手士氣升紅鑽讓唔起

猪拉多纳

中村續約1年

天皇盃16強今日揭開戰幔，浦和紅鑽喺琦玉縣對橫濱水手，1.57倍「讓客」值得捧場，原因係紅鑽教練柏杜域唔能夠親自領軍，首席射手原口元氣又因傷缺陣，對家有隊長中村俊輔改變主意應承續約1年，士氣回升受讓抵撐。

（開賽時間：周六下午3:00）
紅鑽射手原口元氣打柴

今場比賽場地琦玉縣熊谷文化公園競技場，並唔係紅鑽慣用嘅主場，前兩季佢哋淪落到要護級，今年搵到新教練柏杜域執教，升勢勁過近期嘅A股，拎到聯賽第3名進軍下屆亞冠盃，可想而知，今場柏杜域因為腰傷唔可以親自領軍，要由助教堀孝史揸旗效果會差好遠。仲有呀，由於原口元氣傷咗，確定離隊嘅射手田中達也今場會打正選，雪到硬晒點信得過？

況且，水手喺聯賽得梗頸四攞唔到亞冠盃入場券，天皇盃肯定搏命，最重要係原本有傳會重返些路迪嘅王牌中村俊輔，據講已決定以1.3億日圓年薪留効，對於收咧前有5勝1和1負嘅水手嚟講，絕對係提升戰意強心針。再講，水手教練樋口靖洋已確定獲得留用，有傷嘅射手馬昆奴斯同門將榎木哲也相信會頂硬上搏殺，對住死對頭紅鑽唔會輕易投降。
天皇盃賽制

今輪為第4圈賽事，若在90分鐘內打成平手，則需加時30分鐘再決勝負。倘若加時仍未分出勝負，則互射12碼決勝負。