多蒙特總部遇襲搵賀芬咸出氣

猪拉多纳

多蒙特上場因球證錯判，輸12碼又打少個下，結果以2:3負禾夫斯堡，12場不敗走勢就咁斷咗，或者黑開有條路，尋日《圖片報》又爆料話，多蒙特辦公室畀班抗議德甲新保安制度嘅球迷用氣槍發射色彈「襲擊」，門口好似畀人追債淋咗油咁，谷埋谷埋喺今晚德甲作客賀芬咸時肯定要爆，一於捧2.05倍「讓球客勝」。

（有線61、64、201及204周日晚10:30直播)
沙利荷域鬥攻衰多兩錢重

多蒙特今季分心歐聯，所以畀多踢一場嘅拜仁拋甩15分，但其實班波質素唔差，你睇佢哋對皇馬、曼城都贏到就知。雖然蜜蜂兵團爭標渺茫，但都要保住歐聯資格，所以今晚鬥賀芬咸唔會放軟手腳。上場因誤判領紅嘅後衞舒姆沙今場可以上陣，球隊只係多咗隊長基爾唔踢得，陣容大致完整。

賀芬咸5連敗失15球，防線紙咁薄。賽前中場沙利荷域大口氣話贏多蒙特3球，唔通佢唔知自己隊波喺德甲主場失球最多？鬥攻相信會益晒多蒙特。而且賀芬咸大把傷兵，門將韋爾斯、波利斯胡錫域、史提芬菲斯卡同馬比錫倦勤，戴迪約克或要拍新仔禾蘭攻堅，咁搞法攻守都唔掂，一於博多蒙特大勝。