阿仙奴上齊彈藥「大」破雷丁

猪拉多纳

教授癲咗？今季阿仙奴戰績插水，但領隊雲格死撐話家陣呢隊，仲勁過02年攞英超冠軍嘅「兵工廠」，甚至受唔住記者挑釁亂噏話要買美斯，加上門將施捷斯尼掛住夜蒲，成隊簡直亂晒龍。今晚雷丁喺英超主場對阿仙奴，癲鬥癲玩1.59倍入球大好路！

（有線200及300、廣東體育周二凌晨4:00直播）
死撐勁過02年冠軍隊

阿仙奴喺聯賽盃強陣輸畀乙組仔巴拉福特，近4場得1勝3負，加上聯賽唔掂，經已創出雲格執教以嚟嘅最差戰績，連死忠嘅廠迷都忍唔住嗌佢走，難怪教授傷心到幾乎流眼淚，賽後被傳媒挑釁更加無名火起大反擊，佢話依家嘅阿仙奴只係未夾熟，實力根本勁過02年成為聯賽冠軍嗰隊，明顯接受唔到失敗。

仲有呀，雲格話自己好愛阿仙奴，絕對唔會走，又話今季使咗唔少錢買人，反問記者咩至係大收購，發晦氣話要買美斯畀佢哋睇，可以想像「兵工廠」作客雷丁會用盡所有彈藥進行「大」爆破挽回面子，配合射手基奧特傷愈可以復出，同埋近13場得1場冇波入走勢，火力信得過。
施捷斯尼唔生性夜蒲

雷丁5連敗狂失12球，當然好難抵擋阿仙奴轟炸，但佢哋喺聯賽盃曾經領先「兵工廠」4球，最後踢到加時至以5:6出局，呢場肯定唔甘心食白果，趁住「兵工廠」門將施捷斯尼同中場阿歷士張伯倫唔生性，聯賽盃恥辱性出局後仲要畀狗仔隊捉到夜蒲，相信雷丁唔會隨便投降，有望再合演瘋狂入球騷。