拜仁「-1」歇冬進堡

猪拉多纳

德盃16強魚腩飄香

德甲首循環已經結束，踢埋今明兩晚嘅德國盃16強賽事，德國波就會歇冬，今晚4場波重頭戲係奧格斯堡主場對拜仁慕尼黑嘅巴伐利亞打吡，奧格斯堡已成為今季德甲降班膽，佢哋歷來對拜仁往績輸晒，面對班霸冇得發圍，推介拜仁1.55倍「讓球客勝」！

(無綫翡翠台周三凌晨3時30分直播)

德國盃係德國唯一重要盃賽，獎金、榮譽同認受性一向都比其他聯賽嘅盃賽高，拜仁向來重視呢個盃，呢支德甲班霸今季大事擴軍，上半季三線作戰保持強勢，德甲首循環稱雄，並以9分拋離次席利華古遜，球隊兵源遠勝上季，即使三線作戰，踢到現階段未覺攰，佢哋已經失落咗兩屆冠軍，今場點都搏埋佢至歇冬。
副選質優更賣力

教頭軒歷基斯今仗會作出適度輪換，但副選球員雲拜頓、泰摩斯卓克同梳頓沙基利等都具級數，更換個別位置對球隊戰鬥力影響唔大。拜仁今季有三大箭頭輪流用，狀態最差嘅文迪蘇傑近期喺德甲擔正失機頻頻，今仗會讓位畀近期入球率更高嘅馬里奧高美斯，何況仲有個經驗級數都夠高嘅比沙路等緊機會，無論用邊個前鋒，喺競爭咁激烈嘅情況下，無論任何賽事，落到場都肯定搏甩髀。
奧格斯堡弱得可憐

奧格斯堡係德甲最弱球隊之一，首循環聯賽只曾一勝，近8場波都未贏過，上周末榜末大戰作客對難兄難弟格雷特霍夫和波收場，絕對係兩敗俱傷，目前呢兩隊踢完17場波都只係各得9分，同尾四嘅禾夫斯堡已有10分差距，護級形勢極度悲觀，佢哋近兩屆德國盃都係16強止步，過去喺正式賽事3次面對拜仁都輸晒，今晚難做攔路虎。